Qarabağ regionu üzrə bələdçi hazırlığı üçün vebinarlara start verilir

Qarabağ regionu üzrə bələdçi hazırlığı üçün vebinarlara start verilir

15:34 03.11.2020
Noyabrın 16-dan etibarən Dövlət Turizm Agentliyi və Azərbaycan Turizm Bürosu Azərbaycan Turizm Bələdçiləri Assosiasiyası ilə birgə Qarabağın turizm potensialı ilə bağlı bələdçilər üçün vebinarlara start verir.
 
Bu haqda Dövlət Turizm Agentliyinin sədri Fuad Nağıyev rəsmi feysbuk səhifəsində etdiyi paylaşımla məlumat verib.

Qarabağ xalçası, Alban məbədləri, qastronomiya, şərabçılıq, flora və fauna ehtiyatları, etnoqrafik məqamlar və digər mövzuları əhatə edəcək vebinarlar ümumilikdə 12 mövzudan ibarət olmaqla hər biri 2 saat ərzində davam edəcək.
Təşkil ediləcək sual-cavab sessiyasında iştirakçılar qonaq spikerə suallarını ünvanlaya biləcəklər.
 
Qiymətləndirmə mərhələsində qrup işi üzrə tərtib edilmiş mədəni turizm marşrutu broşür formatında hazırlanaraq sənaye nümayəndələrinə təqdim ediləcək.
 
Vebinarlar silsiləsində iştirak etmək istəyən namizədlər müraciətlərini mövzu bölməsinə “Qarabağ” yazmaqla ad, soyad və əlaqə nömrəsini qeyd edərək info@atga.az elektron poçtuna ünvanlaya bilərlər.
 
İştirak üçün son müraciət tarixi 10 noyabrdır.