Ölkələrarası əlaqələr

Turizm sahəsində əməkdaşlığın aparıldığı ölkələrlə müxtəlif istiqamətlər üzrə müqavilə-hüquq bazasının inkişaf etdirilməsi məqsədilə dövlətlərarası və beynəlxalq təşkilatlarla sazişlər və müqavilələr bağlanmışdır. Turizm sahəsi üzrə 1992-ci ildən bu günədək 23-ü hökumətlərarası olmaqla 28 Saziş, 10 Anlaşma Memorandumu, 2 protokol imzalanmışdır. Sözügedən sənədlərin icrasının həyata keçirilməsi ilə bağlı tədbirlər proqramı hazırlanaraq təsdiq olunmuş, qarşı tərəflərlə görüşlər təşkil olunaraq əməkdaşlıq perspektivləri müzakirə edilmiş, habelə imzalanmış sənədlərin müddəa və şərtlərinə əsasən əməkdaşlıq tədbirləri həyata keçirilməyə başlanmışdır. Agentliyin turizm strategiyasına uyğun olaraq 2018-ci ilin sonlarında 6 ölkədə Azərbaycanın rəsmi turizm nümayəndəlikləri fəaliyyətə başlamışdır. Almaniya, BƏƏ, Səudiyyə Ərəbistanı, Çin, Hindistan və Rusiyada açılmış nümayəndəliklər fəaliyyət göstərdikləri ölkə və region üzrə Azərbaycanın turizm potensialının təbliği, marketinq araşdırmaları, təbliğat materiallarının hazırlanması və yayımlanması, təlimlərin keçirilməsi və s. kimi istiqamətlər üzrə fəaliyyət göstərirlər. Rəsmi turizm nümayəndəliklərinin ölkəmizə aid seminarların, eləcə də yerləşdiyi regionlardakı və Azərbaycandakı turizm və səyahət şirkətlərinin əməkdaşlıq etməsi üçün görüşlərin təşkil edilməsi, Azərbaycanın beynəlxalq sərgilərdə təmsil olunmasına dəstək verilməsi və koordinasiya işlərini həyata keçirərək ikitərəfli əlaqələrin stimullaşdırılmasına xidmət etməsi nəzərdə tutulmuşdur.

Dövlət Turizm Agentliyi hazırda bir çox beynəlxalq təşkilatlarla əməkdaşlıq edir. Sözügedən təşkilatlardan Birləşmiş Millətlər Ümumdünya Turizm Təşkilatı (BMÜTT), Qara Dəniz İqtisadi Əməkdaşlıq Təşkilatı (QDİƏT), Türkdilli Dövlətlərin Əməkdaşlıq Şurası, Demokratiya və İqtisadi İnkişaf naminə Təşkilat (GUAM), İqtisadi Əməkdaşlıq Təşkilatı (İƏT) və digər təşkilatlarla turizm sahəsində əməkdaşlıq aparılır.

Ölkələrarası əlaqələr

Turizm sahəsində əməkdaşlığın aparıldığı ölkələrlə müxtəlif istiqamətlər üzrə müqavilə-hüquq bazasının inkişaf etdirilməsi məqsədilə dövlətlərarası və beynəlxalq təşkilatlarla sazişlər və müqavilələr bağlanmışdır. Turizm sahəsi üzrə 1992-ci ildən bu günədək 23-ü hökumətlərarası olmaqla 28 Saziş, 10 Anlaşma Memorandumu, 2 protokol imzalanmışdır. Sözügedən sənədlərin icrasının həyata keçirilməsi ilə bağlı tədbirlər proqramı hazırlanaraq təsdiq olunmuş, qarşı tərəflərlə görüşlər təşkil olunaraq əməkdaşlıq perspektivləri müzakirə edilmiş, habelə imzalanmış sənədlərin müddəa və şərtlərinə əsasən əməkdaşlıq tədbirləri həyata keçirilməyə başlanmışdır. Agentliyin turizm strategiyasına uyğun olaraq 2018-ci ilin sonlarında 6 ölkədə Azərbaycanın rəsmi turizm nümayəndəlikləri fəaliyyətə başlamışdır. Almaniya, BƏƏ, Səudiyyə Ərəbistanı, Çin, Hindistan və Rusiyada açılmış nümayəndəliklər fəaliyyət göstərdikləri ölkə və region üzrə Azərbaycanın turizm potensialının təbliği, marketinq araşdırmaları, təbliğat materiallarının hazırlanması və yayımlanması, təlimlərin keçirilməsi və s. kimi istiqamətlər üzrə fəaliyyət göstərirlər. Rəsmi turizm nümayəndəliklərinin ölkəmizə aid seminarların, eləcə də yerləşdiyi regionlardakı və Azərbaycandakı turizm və səyahət şirkətlərinin əməkdaşlıq etməsi üçün görüşlərin təşkil edilməsi, Azərbaycanın beynəlxalq sərgilərdə təmsil olunmasına dəstək verilməsi və koordinasiya işlərini həyata keçirərək ikitərəfli əlaqələrin stimullaşdırılmasına xidmət etməsi nəzərdə tutulmuşdur.

Dövlət Turizm Agentliyi hazırda bir çox beynəlxalq təşkilatlarla əməkdaşlıq edir. Sözügedən təşkilatlardan Birləşmiş Millətlər Ümumdünya Turizm Təşkilatı (BMÜTT), Qara Dəniz İqtisadi Əməkdaşlıq Təşkilatı (QDİƏT), Türkdilli Dövlətlərin Əməkdaşlıq Şurası, Demokratiya və İqtisadi İnkişaf naminə Təşkilat (GUAM), İqtisadi Əməkdaşlıq Təşkilatı (İƏT) və digər təşkilatlarla turizm sahəsində əməkdaşlıq aparılır.

Birləşmiş Millətlər Ümumdünya Turizm Təşkilatı (BMÜTT)

Turizm sahəsində aparıcı beynəlxalq təşkilat olmaqla yanaşı, bu sahədə iqtisadi artım, inkluziv inkişaf və ekoloji davamlılığı təmin edən və turizm təbliğatına cavabdeh təşkilatdır. Dövlət Turizm Agentliyinin nümayəndələri təşkilat tərəfindən keçirilən beynəlxalq tədbirlərdə mütəmadi olaraq iştirak edir. 2018-ci ilin 30 oktyabr-1 noyabr tarixlərində Bəhreynin Manama şəhərində keçirilən “BMÜTT-nin İcraiyyə şurasının 109-cu sessiyası”nda Azərbaycan Agentliyin nümayəndə heyəti tərəfindən təmsil edilmiş, ölkəmizdə turizm sənayesinin inkişafı üçün dövlət tərəfindən görülən işlər və həyata keçirilən islahatlar, həmçinin bu islahatların müsbət nəticələri haqqında məlumat verilmiş, ölkə başçısının müvafiq fərmanı ilə yaradılan Dövlət Turizm Agentliyinin fəaliyyətinin əsas istiqamətləri vurğulanmışdır.

Qara Dəniz İqtisadi Əməkdaşlıq Təşkilatı (QDİƏT)

regional əməkdaşlığın əsas istiqamətlərini müəyyən etmək və region dövlətləri arasında əlaqələrin inkişaf etdirilməsi məqsədi ilə yaradılmış təşkilatdır. Belə ki, 2018-ci ilin 2 noyabr tarixində QDİƏT turizm sahəsində əməkdaşlıq üzrə işçi qrupunun İstanbulda keçirilmiş iclasında Dövlət Turizm Agentliyi təmsil olunmuşdur.

Türkdilli Dövlətlərin Əməkdaşlıq Şurası

Türkdilli dövlətlər arasında turizm sahəsində əməkdaşlığın genişləndirilməsi, regionda və Türk Şurasına üzv dövlətlərdə İpək Yolunun tarixi və mədəni əhəmiyyətinə dair məlumatlılığın artırılması işlərini aparan təşkilatdır. Təşkilatla əməkdaşlıq çərçivəsində 2018-ci ilin 7 avqust tarixində Qazaxıstanın Astana şəhərində Dövlət Turizm Agentliyi və Azərbaycan Turizm Bürosunun nümayəndələri “Turizm üzrə işçi qrupunun 13-cü iclası” nda iştirak etmişlər.

Demokratiya və İqtisadi İnkişaf naminə Təşkilat (GUAM)

Gürcüstan, Ukrayna, Azərbaycan və Moldovanı birləşdirən regional təşkilatdır. Sözügedən təşkilat çərçivəsində əməkdaşlığın genişləndirilməsi, eləcə də Yaponiyadan GUAM regionuna turistlərin cəlb edilməsi məqsədilə 2019-cu il ərzində Azərbaycan və Gürcüstan sxemi üzrə birgə info-turun keçirilməsi planlaşdırılır.

Dövlət Turizm Agentliyinin sədri Fuad Nağıyevin BMT-nin Ümumdünya Turizm Təşkilatının (UNWTO) İcraiyyə Şurasının 109-cu sessiyasında iştirakı – 31.10.2018. Bəhreyn, Manama

2018-ci ilin 31 oktyabr tarixində Bəhreynin Manama şəhərində baş tutan və 40-a yaxın ölkədən 100-dən çox nümayəndənin iştirak etdiyi tədbirdə Azərbaycanı Dövlət Turizm Agentliyinin sədri Fuad Nağıyevin rəhbərlik edtdiyi nümayəndə heyəti təmsil edib. Tədbirdə çıxış edən Fuad Nağıyev üzv ölkələrlə əməkdaşlığın vacibliyini və bu əməkdaşlığın Azərbaycanda turizm sahəsinin inkişafındakı rolunu qeyd edib. Çıxış zamanı ölkəmizdə turizm sənayesinin inkişafı üçün dövlət tərəfindən görülən işlər və həyata keçirilən islahatlar, həmçinin bu islahatların müsbət nəticələri haqqında məlumat verilib, cari ilin aprel ayında ölkə başçısının müvafiq fərmanı ilə yaradılan Dövlət Turizm Agentliyinin fəaliyyətinin əsas istiqamətləri vurğulanıb. Agentlik sədri BMT-nin Ümumdünya Turizm Təşkilatının (UNWTO) İcraiyyə Şurasının növbəti iclasın Bakı şəhərində keçiriləcəyini xatırladıb və bütün üzv dövlətləri ölkəmizə dəvət edib.

Dövlət Turizm Agentliyinin sədri Fuad Nağıyev və BMT-nin Ümumdünya Turizm Təşkilatının Baş katibi Zurab Pololikaşvili arasında Madrid şəhərində Ümumdünya Turizm Təşkilatının (BMÜTT) İcraiyyə Şurasının növbəti 110-cu sessiyasının 2019-cu ilin iyun ayında Bakı şəhərində keçirilməsinə dair sazişin imzalanması – 22.01.2019

2019-cu ilin yanvarın 22-də Madrid şəhərində Dövlət Turizm Agentliyinin sədri Fuad Nağıyev və BMT-nin Ümumdünya Turizm Təşkilatının Baş katibi Zurab Pololikaşvili arasında Ümumdünya Turizm Təşkilatının (BMÜTT) İcraiyyə Şurasının növbəti 110-cu sessiyasının cari ilin iyun ayında Bakı şəhərində keçirilməsinə dair saziş imzalanıb. İmzalanma mərasimində Fuad Nağıyev hər kəsi Bakıya, Azərbaycana dəvət edərək ölkənin yeni turizm brendinin konsepsiyasına uyğun olaraq Azərbaycana bir daha yenidən baxmağa, zəngin tariximizi, mədəniyyətimizi, dadlı mətbəximizi, fərqliliyimizi, qonaqpərvər və mehriban insanlarımızı yenidən tanımağa çağırıb. İcraiyyə Şurasının Bakıda keçiriləcək 110-cu sessiyasında dünyanın 35 ölkəsindən turizm üzrə nazirlərin iştirakı gözlənilir.

İspaniyanın paytaxtı Madriddə turizm sahəsində ən iri tədbirlərdən biri olan “FITUR 2019” 39-cu ənənəvi Beynəlxalq Turizm Sərgisi baş tutub. Azərbaycanı beynəlxalq sərgidə Dövlət Turizm Agentliyinin sədri Fuad Nağıyevin başçılıq etdiyi nümayəndə heyəti təmsil edir. BMT-nin Ümumdünya Turizm Təşkilatının (BMTÜTT) baş katibi Zurab Pololikaşvili və Dövlət Turizm Agentliyinin sədri Fuad Nağıyev “FITUR 2019” çərçivəsində yanvarın 22-də Madriddə BMTÜTT-ün qərargahında qurumun İcraiyyə Şurasının 110-cu sessiyasının Bakıda keçirilməsi haqqında saziş imzalayıblar. Görüşdə Azərbaycanın İspaniya Krallığındakı səfiri və Ümymdünya Turizm Təşkilatı yanında daimi nümayəndəsi Anar Məhərrəmov iştirak edib. Fuad Nağıyev görüşdə bildirib ki, bu tədbirin ölkəmizdə keçirilməsi Azərbaycan ilə BMTÜTT arasında çoxtərəfli əməkdaşlığın inkişafı işində böyük əhəmiyyət daşıyacaq. Dünyanın 40-dan çox ölkəsinin rəsmi nümayəndələri və başqa qonaqlar ölkəmizin turizm potensialı və mədəniyyət-sağlamlıq imkanları ilə bilavasitə tanış olmaq imkanı əldə edəcəklər. BMÜTT-nin baş katibi Zurab Pololikaşvili Azərbaycanın BMTÜTT İcraiyyə Şurasının 110-cu sessiyasını yüksək səviyyədə keçirəcəyindən əmin olduğunu bildirib. Sessiyanın təşkili işində uğurlar arzu edən Z.Pololikaşvili vurğulayıb ki, başçılıq etdiyi qurum Azərbaycanda turizmin inkişafına hər cür dəstək göstərməyə hazırdır. Fuad Nağıyev “Azərbaycan – yenidən fərqli baxışla bax" yeni turizm brendinin şüarına müvafiq olaraq ölkəmizin zəngin tarixi, mədəniyyəti, milli mətbəxi, azərbaycanlıların səmimiyyəti və qonaqpərvərliyi tanış olmaları üçün həmkarlarını ölkəmizə dəvət edib.

Pekində “Azərbaycan Respublikası Dövlət Turizm Agentliyi və Çin Xalq Respublikası Mədəniyyət və Turizm Nazirliyi arasında çinli turistlərin Azərbaycan Respublikasına qrup səfərlərinin sadələşdirilməsi haqqında Anlaşma Memorandumu”nun imzalanması – 01.03.2019

Martın 1-də Pekində “Azərbaycan Respublikası Dövlət Turizm Agentliyi və Çin Xalq Respublikası Mədəniyyət və Turizm Nazirliyi arasında çinli turistlərin Azərbaycan Respublikasına qrup səfərlərinin sadələşdirilməsi haqqında Anlaşma Memorandumu” imzalanıb. Memorandum sənədini Azərbaycan tərəfindən Agentliyin sədri Fuad Nağıyev, Çin tərəfindən isə ÇXR-in mədəniyyət və turizm nazirinin müavini Janq Syu imzalayıb. Sənəd 27 fevral - 1 mart tarixlərində Pekin şəhərində “Azərbaycan-Çin Hökumətlərarası Ticarət-İqtisadi Əməkdaşlıq Komissiyası”nın 7-ci iclası çərçivəsində imzalanıb.

Fuad Nağıyevin sözlərinə görə sözügedən sənəd iki ölkə arasında turizm sahəsində əməkdaşlığın yeni mərhələsindən xəbər verir.

“Yeni müqaviləyə əsasən yaxın illərdə Azərbaycana gələcək çinli turistlərin sayı 200 min nəfərə çata bilər. 2018-ci ildə bu istiqamətdə 50% artım müşahidə olunub. İndi isə biz Çindən Azərbaycana bir neçə dəfə çox turist gələcəyini deyə bilərik”, - deyə Dövlət Turizm Agentliyinin sədri Fuad Nağıyev diqqətə çatdırıb.

“Çin ölkəmizə turistlərin cəlb edilməsi üçün əsas prioritet bazarlardan biri seçilib. Ümumilikdə, 12 hədəf istiqamət mövcuddur. Buraya həm postsovet məkanı, həm Asiya, həm Avropa, həm Yaxın Şərq daxildir. Çin də daxil olmaqla, artıq altı ölkədə Azərbaycanın rəsmi turizm nümayəndəliyi fəaliyyət göstərir. Yaxın gələcəkdə daha 4 ölkədə nümayəndəliyimiz açılacaq”, - deyə Fuad Nağıyev qeyd edib. ;

Dövlət Turizm Agentliyi və Azərbaycan Turizm Bürosunun təşkilatçılığı ilə Azərbaycan Moskvada keçirilən “MITT 2019” sərgisində DTA sədri Fuad Nağıyevin iştirakı – 12.03.2019

Dövlət Turizm Agentliyi və Azərbaycan Turizm Bürosunun təşkilatçılığı ilə Azərbaycan 2019-cu ilin 12-14 mart tarixlərində Moskvada keçirilən “MITT 2019” sərgisində iştirak edib. Sərgidə ölkəmizi 20-dən çox turizm şirkəti və hotellərin nümayəndələri təmsil edib. Yeni turizm brendinə uyğun dizayn edilmiş stendimizdə videoçarxlar nümayiş etdirilib, təbliğat çap materialları paylanılıb. Azərbaycan stendinin açılışında çıxış edən Fuad Nağıyev Rusiyanın Azərbaycan turizm bazarının ən önəmli iştirakçılardan biri olduğunu, ildən-ilə Azərbaycan gələn rusiyalı turistlərin sayında artım müşahidə edildiyini qeyd edib. Sərgi çərçivəsində Fuad Nağıyev bir sıra iri turizm şirkətlərinin nümayəndələri və dövlət rəsmiləri ilə görüşlər keçirib.

Rusiyanın Sankt-Peterburq şəhərində Ümumdünya Turizm Təşkilatının Baş Assambleyasının 23-cü sessiyasında DTA sədri Fuad Nağıyevin iştirakı – 09.09.2019

BMT-nin Ümumdünya Turizm Təşkilatının Baş Assambleyası Moskvada "Hamı faydalanır: qlobal şəhərlərdə turizmin inkişafı strategiyaları" adlı sessiya keçirib. İşgüzar proqramda iştirakçılar Baş Assambleyanın 23-cü sessiyasında toxunulan turizmin dayanıqlı inkişafı, təhsil, yeni iş yerlərinin açılması, həmçinin turizmdə innovasiyanın vacibliyi mövzularını müzakirə ediblər. Müzakirələrdə Dövlət Turizm Agentliyinin sədri Fuad Nağıyev də iştirak edib. Agentlik sədri çıxışı zamanı bildirib ki, son illər Azərbaycanın şəhər və regionlarında turizmin inkişafı üçün dövlət tərəfindən geniş infrastruktur işləri görülür. Bununla paralel olaraq Agentlik turistlərin Azərbaycana cəlb edilməsi üçün xarici ölkələrdə geniş marketinq işləri aparır. Fuad Nağıyev, həmçinin Azərbaycanda yeni turizm məhsullarının yaradılmasına və inkişafına, eyni zamanda mədəni irsin qorunub saxlanmasına dövlət tərəfindən xüsusi diqqət ayrıldığını bildirib. Azərbaycanda turizm sahəsində təhsilə də xüsusi diqqət yetirildiyini bildirən Agentlik sədri yeni turizm məktəbinin yaradılması üçün işlərin aparıldığını diqqətə çatdırıb. Azərbaycan torpaqlarının bir hissəsinin hələ də işğal altında saxlanıldığını deyən Fuad Nağıyev bu səbəbdən ölkənin turizm potensialını tam göstərə bilməməsini də sessiya iştirakçılarının diqqətinə çatdırıb.

Tbilisi şəhərində Dövlət Turizm Agentliyinin sədri Fuad Nağıyev və Gürcüstan Milli Turizm Administrasiyasının rəhbəri Mariam Kvrivişvili arasında görüş – 04.10.2019

“Azərbaycan və Gürcüstan turizm sahəsində rəqabət deyil, əməkdaşlıq mühitində fəaliyyət göstərəcək”.

Bu haqda 2019-cu ilin oktyabrın 4-də Tbilisi şəhərində baş tutan görüşdə Dövlət Turizm Agentliyinin sədri Fuad Nağıyev və Gürcüstan Milli Turizm Administrasiyasının rəhbəri Mariam Kvrivişvili bəyan ediblər. Tbilisidə keçirilən görüş çərçivəsində iki ölkə arasında turizm sahəsində əməkdaşlıq, birgə turların təşkili, həmçinin sərgilərdə birgə stendlərin nümayişi kimi mövzular müzakirə edilib və bu barədə ilkin razılıq əldə olunub.
Azərbaycan və Gürcüstanı yaxın dostluq və qonşuluq əlaqələrinin birləşdirdiyi diqqətə çatdırılan görüşdə iki ölkənin bu sahədə rəqabət mühitində deyil, əməkdaşlıq mühitində fəaliyyət göstərəcəyi, birgə fəaliyyətin regionda turizmin inkişafına öz töhfəsini verəcəyi diqqətə çatdırılıb. Görüşdə, həmçinin Azərbaycanın Gürcüstandakı səfiri Dursun Həsənov və Azərbaycan Turizm Bürosunun baş icraçı direktoru Florian Zenqstşmid də iştirak edib.

Şanxayda keçirilmiş 2-ci Çin Beynəlxalq İdxal Sərgisində DTA sədri Fuad Nağıyevin iştirakı – 14.11.2019

2019-cu ilin 14 noyabr tarixində Şanxayda keçirilmiş 2-ci Çin Beynəlxalq İdxal Sərgisi çərçivəsində Azərbaycanın turizm potensialının təqdimatı zamanı Azərbaycana daha çox turistin cəlb olunması üçün Çinin müvafiq dövlət qurumları və şirkətlər ilə fəal işin aparıldığı bildirilib. Sərginin paralel forumlarından olan 2-ci Çin sərgi sənayesi ticarəti beynəlxalq forumunda çıxış edən Dövlət Turizm Agentliyinin sədri Fuad Nağıyev bildirib ki, son illər ölkəmizdə turizm sənayesində böyük inkişaf müşahidə olunur. Hökumətin bu sahənin inkişafı ilə bağlı strateji planına uyğun olaraq görülmüş işlər nəticəsində Azərbaycanda turizmin müxtəlif növləri üzrə ən müasir standartlara uyğun infrastruktur yaradılır. Gözəl təbiəti, rəngarəng iqlimi, tarixi və müasir memarlıq nümunələri, təbii müalicəvi yerləri, zəngin və dadlı mətbəxi ilə Azərbaycan turizm sektoru sürətlə böyüyən ölkəyə çevrilir. Bundan başqa, Azərbaycan, xüsusən də paytaxt Bakı beynəlxalq tədbirlərin, nüfuzlu idman yarışlarının keçirildiyi məkana çevrilib. Ötən bir neçə ildə Bakıda beynəlxalq səviyyəli 50 tədbir keçirilib. Bununla yanaşı, paytaxtımız 2022-ci ildə Beynəlxalq Astronavtika Konqresinə ev sahibliyi etmək hüququ qazanıb. Bütün bu amillər əcnəbi turistlərin marağına səbəb olur. F.Nağıyev qeyd edib ki, Azərbaycan Çin ilə digər sahələrdə olduğu kimi turizm üzrə də əməkdaşlığın inkişafına böyük önəm verir. Ölkəmizə daha çox Çin turistlərinin cəlb olunması məqsədilə ötən ilin dekabrından etibarən Çində Azərbaycan Turizm Bürosunun rəsmi nümayəndəliyi fəaliyyətə başlayıb. Cari ilin martında isə Çinin Mədəniyyət və Turizm Nazirliyi və Azərbaycan Respublikası Dövlət Turizm Agentliyi arasında çinli turistlərin Azərbaycana qrup səfərlərinin sadələşdirilməsi haqqında Anlaşma Memorandumu imzalanıb. Hazırda Bakı ilə Çinin Pekin və Urumçi şəhərləri arasında birbaşa hava əlaqəsinin mövcudluğu, Çin vətəndaşları üçün 2016-cı ilin fevralından etibarən sadələşdirilmiş viza rejiminin tətbiqi, habelə “ASAN Viza" sisteminin fəaliyyəti çinli turistlərin Azərbaycana səfər imkanlarını genişləndirib. Bundan başqa, Çinin müxtəlif şəhərlərində Azərbaycanın turizm imkanlarının təqdimatları keçirilib, ölkənin tanınmış onlayn səyahət platformaları - 300 milyondan çox istifadəçiyə xidmət göstərən “Trip.com” və 100 milyondan çox istifadəçisi olan “Qyer.com” ilə əməkdaşlıq aparılır. Bunların nəticəsidir ki, ölkəmizə səfər edən çinlilərin sayında ciddi artım müşahidə olunur. Forumda Azərbaycanın turizm brendi “Azerbaijan: Take Another Look” (“Azərbaycan: Bir daha bax”) filmi nümayiş olunub. Qeyd edək ki, 2-ci Çin Beynəlxalq İdxal Sərgisi çərçivəsində Azərbaycanın ölkə pavilyonunda respublikamızın turizm potensialına dair videoçarxlar, nəşrlər, elektron materiallar nümayiş olunub.

Madriddə keçirilmiş “FITUR 2020” sərgisində DTA sədri Fuad Nağıyevin iştirakı – 23.01.2020 – 26.01.2020

2020-ci ilin 23-26 yanvar tarixlərində Madriddə 40-cı Beynəlxalq “FITUR-2020” turizm sərgisi keçirilib. Ölkəmiz bu nüfuzlu tədbirdə Dövlət Turizm Agentliyinin və Respublikamızın İspaniya Krallığındakı səfirliyinin təşkilati dəstəyi ilə uğurla təmsil olunub. Turizm sərgisinin işində Azərbaycanın “Siso Travel”, “Turizm.az” və “ENC tours.turizm” şirkətləri iştirak edib. Ölkəmiz “Azərbaycan – bir də bax” devizi ilə təmsil olunub.

Sərgidə Azərbaycanın turizm potensialını əks etdirən stend ingilis və ispan dillərində materiallarla təchiz olunub. Sərgi çərçivəsində İspaniyanın və digər ölkələrin turizm şirkətləri arasında işgüzar görüşlər keçirilib.

Dövlət Turizm Agentliyinin sədri Fuad Nağıyev deyib: “FITUR-2020” Avropanın turizm bazarında mühüm hadisələrdən biridir. Azərbaycan burada əvvəlki illərdə də iştirak edib. Bu sərgi Azərbaycanın Avropa, Latın Amerikası və Şimali Afrika ölkələrində populyarlaşması üçün böyük imkanlar verir. Bizim daha bir mühüm məqsədimiz burada təmsil olunmuş Ermənistan tərəfindən baş verə biləcək provokasiyaların qarşısını almaqdır. FITUR sərgisinin qaydalarına görə, belə halların qarşısını yalnız bilavasitə iştirak yolu ilə almaq olar. Keçən il belə provokasiyanın qarşısını Azərbaycanın İspaniyadakı səfirliyi ilə birlikdə aldıq”.

Tehranda keçirilmiş İran və Azərbaycan üzrə ikinci ixtisaslaşdırılmış turizm simpoziumunda Dövlət Turizm Agentliyinin sədri Fuad Nağıyevin iştirakı – 15.02.2020

Fevralın 15-də Tehranda İran və Azərbaycan üzrə ikinci ixtisaslaşdırılmış turizm simpoziumu keçirilib. Azərbaycan Respublikasının İrandakı Səfirliyi ilə “Aysan Pərvaz” şirkətinin təşkil etdiyi simpoziumda İranda fəaliyyət göstərən turizm şirkətlərinin rəhbərləri, İqtisadi Əməkdaşlıq Təşkilatının əməkdaşları və media nümayəndələri iştirak ediblər.

Tədbirdə çıxış edən Azərbaycan Respublikası Dövlət Turizm Agentliyinin sədri Fuad Nağıyev ölkəmizin turizm potensialı haqqında məlumat verib. Qeyd olunub ki, ölkələrimizin coğrafi yaxınlığı ikitərəfli əlaqələrin inkişafı üçün böyük imkanlar yaradıb. Son illərdə Azərbaycan ilə İran arasında iqtisadiyyatın müxtəlif sahələrində olduğu kimi turizm sahəsində də qarşılıqlı əlaqələr inkişaf edir. Hazırda turizm qeyri-neft sektorunun aparıcı sahəsinə çevrilib. Bu sahənin inkişafı üzrə dövlət səviyyəsində geniş islahatlar aparılır. Gözəl iqlimə, təbiətə, ləziz mətbəxə, yeni infrastruktura, tarixi abidələrə, mədəni irsə malik olan Azərbaycan Qərb ilə Şərq arasında körpü rolunu oynayır. Azərbaycanı qədimliklə müasirliyin sintezinin ən uyğun nümunəsi hesab etmək olar. Azərbaycan dünyanın ən sabit və təhlükəsiz ölkələrindən biridir. Artıq neçə ildir ki, Azərbaycan dünya miqyaslı idman yarışlarına və beynəlxalq tədbirlərə ev sahibliyi edir. Cari ildə futbol üzrə Avropa çempionatının final mərhələsində 3 qrup oyunu və 1\4 final oyunu Bakıda keçiriləcək. Onu da nəzərə çatdırmaq lazımdır ki, Qəbələ şəhəri 2020-ci il üçün “İslam turizm paytaxtı” seçilib. Bununla əlaqədar olaraq bir sıra beynəlxalq səviyyəli tədbirlər Qəbələdə təşkil olunacaq. İslam əməkdaşlıq Təşkilatının 11-ci konfransı da Qəbələdə keçiriləcək.

F.Nağıyev bildirib ki, Azərbaycan ilə İran arasında turizm əlaqələri genişlənməkdədir. Ötən il İrandan Azərbaycana gələn turistlərin sayı 255 min nəfərdən çox olub ki, bu da 2018-ci illə müqayisədə 6,3 faiz çoxdur. İran Azərbaycan vətəndaşlarının ən çox ziyarət etdikləri ölkələrdən biridir.

Novruz bayramında İrandan Azərbaycana xüsusilə çox turist gəlir. Hazırda Azərbaycana gəlmək istəyən turistlərin səfərlərinin daha da asanlaşması istiqamətində iş aparılır. Ötən il dekabr ayının 1-dən İran vətəndaşlarının Naxçıvan Muxtar Respublikasına səfərlərini asanlaşdırmaq məqsədilə viza rejimi ləğv edilib. Tehran ilə Bakı arasında hər gün birbaşa təyyarə reysləri təşkil edilib.

Nəzərə çatdırılıb ki, turizm şirkətləri arasında əlaqələrin intensivləşməsi üçün seminar və konfranslar da təşkil ediləcək ki, bunlar da iki dost ölkə arasında turizm əlaqələrinin genişlənməsinə təkan verəcək.

Sonra Azərbaycan Turizm Agentlikləri Assosiasiyası ilə İranın Turizm Agentlikləri Assosiasiyası arasında əməkdaşlıq haqqında Memorandum imzalanıb.

Parisdə UNESKO-nun baş qərargahında Azərbaycan Respublikasının Dövlət Turizm Agentliyinin sədri Fuad Nağıyev ilə rəhbərlik etdiyi nümayəndə heyəti qurumun Ümumdünya İrs Mərkəzinin direktorunun müavini Jyoti Hosagrahar ilə görüş – 28.02.2020

Parisdə UNESKO-nun baş qərargahında Azərbaycan Respublikasının Dövlət Turizm Agentliyinin sədri Fuad Nağıyevin rəhbərlik etdiyi nümayəndə heyəti qurumun Ümumdünya İrs Mərkəzinin direktorunun müavini Jyoti Hosagrahar ilə görüşüb. Görüşdə Dövlət Turizm Agentliyi ilə UNESKO arasında əməkdaşlığın perspektivləri müzakirə olunub. Fuad Nağıyev yeni yaradılmış Dövlət Turizm Agentliyinin fəaliyyəti, turizm sahəsində ölkədə aparılan islahatlar, eləcə də mədəni irsin qorunması istiqamətində görülən işlər haqqında məlumat verib. Şəki şəhərinin tarixi hissəsi və Şəki Xan sarayının UNESKO-nun Ümumdünya İrs Siyahısına salınması xatırlanaraq bu sahədə əməkdaşlığın perspektivləri müzakirə olunub. Həmçinin turizm sahəsində qarşılıqlı təcrübə mübadiləsinə dair fikir mübadiləsi aparılıb.

UNESKO-nun Parisdə yerləşən baş qərargahında Dövlət Turizm Agentliyinin sədri Fuad Nağıyevin rəhbərlik etdiyi nümayəndə heyəti ilə qurumun Abidələr və Tarixi Yerlər üzrə Beynəlxalq Şurasının (İCOMOS) baş direktoru Mari-Lor Lavenir (Marie-Laure Lavenir) ilə görüşü – 29.02.2020

UNESKO-nun Parisdə yerləşən baş qərargahında Dövlət Turizm Agentliyinin sədri Fuad Nağıyevin rəhbərlik etdiyi nümayəndə heyəti qurumun Abidələr və Tarixi Yerlər üzrə Beynəlxalq Şurasının (İCOMOS) baş direktoru Mari-Lor Lavenir (Marie-Laure Lavenir) ilə görüşüb. Ölkəmizin UNESKO yanında daimi nümayəndəliyinin rəhbəri, səfir Anar Kərimovun da iştirak etdiyi görüşdə Dövlət Turizm Agentliyi ilə İCOMOS arasında əməkdaşlığın perspektivləri müzakirə olunub. Belə görüşlərin əhəmiyyətinə toxunan F.Nağıyev gələcəkdə sıx əməkdaşlıq aparılacağına əminliyini bildirib. Agentliyin yaranma tarixi, strukturu, eləcə də qurumun Qoruqları İdarəetmə Mərkəzi və onun fəaliyyəti haqqında ətraflı məlumat verib.

Görüşdə İCOMOS ilə bir sıra istiqamətlərdə, xüsusilə də təcrübə mübadiləsi sahəsində əməkdaşlığın vacibliyi diqqətə çatdırılıb. Şəki nominasiyası - Şəki şəhəri və Xan Sarayının Ümumdünya İrs Siyahısına salınması ətrafında fikir mübadiləsi aparılıb. Bu istiqamətdə gələcək əməkdaşlıq nəzərdən keçirilib. Abidələr və Tarixi Yerlər üzrə Beynəlxalq Şurasının (İCOMOS) baş direktoru Mari-Lor Lavenir UNESKO-nun Ümumdünya İrs Komitəsinin 43-cü sessiyası çərçivəsində Bakıya səfərini xatırlayıb. Azərbaycanda geniş turizm imkanlarının olduğunu vurğulayaraq, rəhbərlik etdiyi qurumun ölkəmizlə bu sahədə əməkdaşlıq etməyə və təcrübələrini bölüşməyə hazır olduğunu bildirib.

Dövlət Turizm Agentliyinin sədri Fuad Nağıyevin pandemiya dövründə dünya turizminin vəziyyəti və post-pandemiya dövrü üçün ölkələr tərəfindən nəzərdə tutulan planlar haqqında ÜTT tərəfindən təşkil olunmuş “Bərpaya doğru yol” mövsuzunda video konfransda iştirakı – 01.06.2020

2020-ci ilin iyunun 1-də pandemiya dövründə dünya turizminin vəziyyəti və postpandemiya dövrü üçün ölkələr tərəfindən nəzərdə tutulan planlar haqqında “Bərpaya doğru yol” mövsuzunda video-konfrans keçirilib. Region ölkələri arasında keçirilən konfransda çıxış edən Dövlət Turizm Agentliyinin sədri Fuad Nağıyev Özbəkistanın Baş nazirinin müavini, Turizmin inkişafı üzrə Dövlət Komitəsinin sədri Aziz Abduxakimov və Zurab Polokalaşviliyə təşəbbüs üçün təşəkkürünü bildirib və pandemiyanın Azərbaycan turizminə təsirlərinin azaldılması və sənayenin bərpası üçün görülən tədbirlər barəsində məlumat verib. O bildirib ki, Azərbaycan hökuməti və Dövlət Turizm Agentliyi tərəfindən 2020-ci ilin fevral ayının ikinci yarısından etibarən turizm sənayesinin dayanıqlılığını təmin etmək və pandemiyanın təsirlərini minimuma endirilmək üçün preventiv tədbirlər görülüb.

O qeyd edib ki, pandemiyanın turizmə mümkün təsirləri barəsində müxtəlif ssenarilər hazırılanaraq hökumətə təqdim edilib. Buraya gözlənilən risklər, iş yerlərinin saxlanılması və turizm sahəsində sahibkarların fəaliyyətinə böhranın təsirlərinin azaldılması üzrə təkliflər daxil edilib.

Fuad Nağıyev yerləşmə vasitəsi hesab edilən mehmanxana və mehmanxana tipli obyektlər, turizm agentlikləri və turoperatorlar, iaşə obyektləri üçün dəstək paketi haqqında məlumat verərək may ayının 15-dək proqram çərçivəsində ümumi olaraq əmək haqqı ilə bağlı maliyyə yardımı üçün müraciət etmiş vergi ödəyicilərinə 19 milyon 700 min manatın ayrıldığını bildirib.

Agentlik sədri, həmçinin 2019-cu il ərzində sahibkarlar tərəfindən ödənilən vergilərin geri qaytarılması, orta və kiçik sahibkarlığın 2020-ci il üçün gəlir vergisinin 75%-dən azad olunması, sosial ödənişlər və kreditləşmə üzrə güzəştlərin verilməsi və s. haqqında məlumat verib.

Əlavə edilib ki, proqramdan 650 mehmanxana və mehmanxana tipli obyekt, 18000-dən çox iaşə obyekti və 4402 turagentlik və turoperator faydalanıb.

Bütövlükdə turizmdə normallaşma prosesini dörd mərhələdə nəzərdə tutulduğunu, ilkin mərhələdə təlimlərin keçirilməsi, yeni onlayn platformanın yaradılması, xarici marketinq strategiyasında dəyişiklik, ölkədaxili turizm kampaniyasının təşviq edilməsi və sənayenin dəstəklənməsi, ikinci mərhələdə daxili turizmin bərpasının planlaşdırıldığını, üçüncü və dördüncü mərhələdə isə artıq sərhədlərin ilk növbədə qonşu və daha sonra digər ölkələrlə açılmasının planlaşdırılğını qeyd edib.

Fuad Nağıyev postpandemiya dövründə ilk növbədə daxili turizmin inkişafının prioritet istiqamət olacağını vurğulayıb və ortamüddətli planda daxili turizmin inkişafı üçün xüsusi proqramların qəbul edilməsinin nəzərdə tutulduğunu qeyd edib.

Sonda Fuad Nağıyev BMT-nin Ümumdünya Turizm Təşkilatının İcraiyyə Şurasının 110-cu sessiyasının Bakıda keçirildiyini xatırladaraq, yenidən Bakıda belə görüşərin keçiriləcəyinə inamını ifadə edib. O, Azərbaycanın təhlükəsiz turizm destinasiyası olduğunu vurğulayaraq bu mövqenin gücləndirilməsi üçün “SAHMAN” proqramının hazırlandığını əlavə edib.

BMT-nin Ümumdünya Turizm Təşkilatının Baş Katibi Zurab Polokoşvili çıxış edərək turizmin böhranlardan sonra hər zaman daha güclü inkişaf etmək qabiliyyətinə malik olduğunu, tezliklə əvvəlki inkişaf sürətinə geri qayıdacağına inamını ifadə edib.

Konfransda, həmçinin Özbəkistanın Baş nazirinin müavini, Turizmin inkişafı üzrə Dövlət Komitəsinin sədri Aziz Abduxakimov, Belarusun Turizm və idman naziri Sergey Kovalçuk, Tacikistanın Turizmin inkişafı üzrə Komitəsinin sədri Şirin Amonzoda, Rusiyanın Turizm üzrə Federal Agentliyinin rəhbəri Zarina Doquzova, Türkmənistanın mədəniyyət naziri Atageldi Şamıradov, Moldovanın İnvestisiya üzrə Agentliyinin direktoru Rodika Verbeniuk, Gürcüstanın Milli Turizm Administrasiyasının sədrinin birinci müavini Rusudan Mamataşvili, Ermənistanın Turizm üzrə Dövlət Komitəsinin sədr müavini Alfred Koçaryan, Qırğızıstanın Mədəniyyət, informasiya və turizm nazirinin müavini Maksat Damiroğlu, həmçinin müvafiq qurumların əməkdaşları iştirak edib, müvafiq ölkələrin təcrübəsi barəsində fikir mübadilə aparılıb.

Türkdilli Dövlətlərin Əməkdaşlıq Şurasının (TDƏŞ) Turizm Nazirlərinin 5-ci iclası ilə bağlı videokonfransda Dövlət Turizm Agentliyinin sədri Fuad Nağıyevin iştirakı – 23.06.2020

2020-ci ilin iyunun 23-də Türkdilli Dövlətlərin Əməkdaşlıq Şurasının (TDƏŞ) Turizm Nazirlərinin 5-ci iclası videokonfrans formatında təşkil olunub. Videokonfransda çıxış edən Dövlət Turizm Agentliyinin sədri Fuad Nağıyev aprelin 10-da Azərbaycan Respublikasının Prezidenti, Türkdilli Dövlətlərin Əməkdaşlıq Şurasının sədri cənab İlham Əliyevin təşəbbüsü ilə keçirilmiş Türk Şurasının koronavirus pandemiyası ilə mübarizə mövzusuna həsr olunmuş fövqəladə Zirvə görüşünü xatırladıb. O, Türk Şurasının dünya miqyasında dövlət başçıları səviyyəsində COVID-19 pandemiyasına həsr olunmuş Zirvə görüşü təşkil edən ilk beynəlxalq təşkilat olduğunu qeyd edib. Həmçinin əlavə edib ki, bu, türk dövlətlərinin ən yüksək səviyyədə həmrəyliyinin göstəricisidir.

Daha sonra Fuad Nağıyev ilk gündən pandemiya ilə mübarizə çərçivəsində Azərbaycanda görülən operativ və çevik tədbirlər, iqtisadi stabilliyin saxlanılması və iqtisadiyyata dəyən zərərin minimuma endirilməsi üçün atılan addımlar haqqında danışıb.

Turizmin pandemiyadan ən çox zərər çəkən sahə olmasını qeyd edən Fuad Nağıyev Azərbaycan hökuməti və Dövlət Turizm Agentliyi tərəfindən fevral ayının ikinci yarısından başlayaraq pandemiyanın turizm sənayesinə təsirlərini minimuma endirmək üçün görülən preventiv tədbirlər, həmçinin sənayenin bərpası üçün görülən tədbirlərdən bəhs edib.

O vurğulayıb ki, turizm iqtisadiyyatın əsas sahələrindən biri kimi post-pandemiya dövrü üçün Azərbaycanda daha çox dəstəyə ehtiyacı olan sahə kimi qiymətləndirilir.

Fuad Nağıyev, həmçinin turizm sahəsində sahibkarlara verilən dəstək proqramları, Azərbcaycanda ilk növbədə daxili turizmin bərpa olunması, ümumilikdə turizmin mərhələli şəkildə bərpa edilməsinin planlaşdırılması, Dövlət Turizm Agentliyi tərəfindən 2020-2023-cü illəri əhatə edəcək ortamüddətli inkişaf strategiyasının hazırlanması haqqında məlumat verib.

Sonda Fuad Nağıyev dünya turizm sənayesinin tezliklə öz inkişaf tempinə qayıdacağına ümid etdiyini bildirərək Türk Şurasının növbəti görüşlərinin Azərbaycanda keçiriləcəyinə inamını ifadə edib.

Türk Şurasının Baş katibi Bağdad Amreyev, Türkiyənin Mədəniyyət və turizm naziri Mehmet Nuri Ersoy, Özbəkistan, Qazaxıstan və Qırğızıstanın turizm nazirliklərinin, həmçinin təşkilatda müşahidəçi statusa malik Macarıstanın Turizm Agentliyinin nümayəndələrinin iştirak etdiyi görüşdə COVID-19 pandemiyasının yaratdığı məhdudiyyətlər şəraitində üzv ölkələr arasında turizm sahəsində mövcud əlaqələr, postpandemiya dövründə turizm üzrə gələcək əməkdaşlıq məsələləri, pandemiyanın təsirinin azaldılması məqsədilə həyata keçirilən tədbirlər üzrə yeni onlayn treninq proqramının başlanması, Müasir İpək Yolu Turu birgə layihəsi haqqında müzakirələr keçirilib.