Xarici influenserler Bakı ilə tanış olublar

02:00 30.10.2018

Azərbaycanın xaricdə tanıdılması və turistik imkanlarının təbliğinə dəstək məqsədilə Dövlət Turizm Agentliyi, Azərbaycan Turizm Bürosu (Azerbaijan Tourism Board) və Azərbaycan Konqreslər Bürosunun təşkilatçılığı ilə “Global Influencer Day” tədbirinə dəvət olunmuş xarici influenserlər üçün 29 oktyabrda xüsusi tanışlıq proqramı həyata keçirilib. 

Türkiyə, Şimali Kipr, Ukrayna, Qazaxıstan, Rusiya, Avstraliya, Rumıniya, Latviya, BƏƏ kimi ölkələrdən olan qonaqlar “İçərişəhər” Dövlət Tarix-Memarlıq Qoruğunda gəzintidən sonra Bakının digər turistik yerləri ilə tanış olublar. Onlara xalça toxuma, armudu stəkan üzərində rəsm, milli mətbəx nümunələrinin hazırlanması, xına ilə naxış vurma, neftlə şəkil çəkmə üzrə master-klasslar keçirilib, milli musiqimiz nümayiş etdirilib. Bununla da "Keepface" və "FA International Trade Events" tərəfindən təşkil olunmuş “İnnovasiya həftəsi” çərçivəsində keçirilən “Global Influencer Day” tədbiri başa çatıb. 

Nəqliyyat, Rabitə və Yüksək Texnologiyalar Nazirliyi və Heydər Əliyev Mərkəzinin birgə təşkilatçılığı ilə reallaşdırılan, Dövlət Turizm Agentliyi, Azərbaycan Turizm Bürosu, Azərbaycan Konqreslər Bürosu, “ADA” Universiteti, Azərbaycandakı Amerika Ticarət Palatası, CELA və CAMCA network tərəfindən dəstəklənən tədbirdə bir sıra müxtəlif şirkətlər sponsor kimi çıxış ediblər.